مرثية الى :  نَجيب سُرُور

   شهييد الحركة الثقافية المصرية

***

( آه يانَجيب يَاقمَرْ ) ..*

يَاعُود الحَنْضَلْ الوَاِقفْ على التِّرْعَة ..

ِبيتحدَّى هبُوب الرِّيح ،

ِوريح المُوت بتتحدًى جدُور الصَّبْر ِفى الصَّبَّار ..

لاريح المُوتِ تستنًى ولا توقف ْ ،

وَلا عُودك نفد صَبْرُه لآخر يُوم ..

يَاعُود الحَنْضَلْ الوَاقفْ ..

                              علََى الترْعَة  ،

وترْعِتنا مَاليهَا صحَاب  !

ماليها الدُّودِ والطَّحْلبْ

ناِحتـْـهَا ناب زَمَنْ عَاجى بلُون أبنُوس  ،

ِوميٌتها من الفردُوس وغرًاقة  ،

ومُشتاقة لطعم الدًمْ ِوالعلقـَم ْ !

بتجِْرى ِمن ِسنين وسنين  ،

ِو ( يَاسين )  اللى مَات فيهَا ..

غريب مَيِّتْ ِبلا صُحْبَة  ،

                      ..   وَلا قاتل ْ  !!

***

يَاعَمْ نجيب  ..

يَاحتـَّـة ِمنْ جَسَدْ  ( أوزُوريس  )  !!

يَاعُود الحَنـْـضَلْ الوَاقفْ  ،

              وَلا خايفْ ِمن المَتاريس :

طيُور البَحََْر لسًاهًَا علََى الصَّاِرى  ،

ِو ( ايزيسَكْ ) على الشـُّـطْآِن بتلمِْلمْ جَدَايلْهَا  ،

                                     وتمْسَحْ دَمْعَهَا الجَاِرى  ،

ِوتفتكركْ فى ترنيمَة وأغنيًة ..

حَزينة حُزْن أحْلامنا الضَّبًَابيًة

ِبِتصْنَعْ ِمن جَمَاِجمْنَا تابُوت مَنْحُوت  ؛

                            بعَرْض سنيننـَّـا ِوايَّامْنا ،

ِولسًة (  ِكيخُوت )* ِبسيف وَهِْمى ..

بيقطع للهَوَا الدِّرَاعَات عشان يوْصَلْ  ،

ِويخطـَـف ْ– ِبالخياَل -  ( دُولسين ) *..

                      علَى فرَسُه اللِّى مِشْ مَوْجُود  ،

                                                       ِوبيغنىِّ  :

"  ِبينى وبينـك ْ ..   سُــور وَرَا سُــور

    وَانَا لامَـــاِردْ   ..    وَلا عَصْفـُــــور "  !!

وايقاع الزَّمَنْ ِبيدُور ..

                  عَلى ِرتْم البُكَا والنُّوح

ِمنين مَاترُوح تلاقينا بأحْزَاننـَّـا  ..

بنضفُرْ دَمْعنَا المَسْفوح ِونستنًى يكُون كُرْبَاج  ؛

يشُـقْ الصَّخْر ويفجَّرْ ..

                 يناِبيع المَطرْ..  ِوالِغيث !!

ِوريتُه الدَّمْع للأخطاءِ كَان ِيغفرْ ،

ِويفتحْ ِسكَّة ِبتنوَّرْ على المَاشيين ..

ليجْرِى الدَّمْع ِباستمْرَار ويبقىَ لُه..

                 ِفى وَاِدى الخَطًـَّـائين أنْهَار  !!

وَانا زَيـَّـكْ ياعَمْ نَجيب ..

غريب عَايشْ ِفى وَادى كبير  ،

                         ِوبَرْضُه نهْر بيشقُّه ..

                                              الى نُصِّين   !!

    

***

يَاعَمْ نجيب وَانا شَايْفكْ ..

بتنِزفْ عَ الرَّصيف أشعَار  ،

ِوبتغنىِّ لِستْ الدَّار ِبأحْلامْهَا ،

ِوبتنوَّرْ لأيَّامْهَا الليالى السُّود  ،

 ِوخَرْسَا ِهىَّ لابتنطقْ  ،

                   وَلا تحلم ْ  ،

                       وبترَقًَّصْ عَلى تَاجْهَا حُطام الدُّود  !!

يَاعَمْ نَجيب ..

يَاحتة ِمن جَسَدْ أوزُوريس   !!

***

   
     ِشعْر/حَسنين السَّيِّدْ حَسَنين
....................................

* مسرحية نجيب سرور(آه .. ياليل ياقمر)
* دون كيشوت - محارب طواحين الهواء
* حبيبة دون كيشوت الوهمية