وتريـــَّــات .. المُغنـِّى العَجُـوز
                                             ( مقاطع منفصلة )
                        ــــــــــــــــــــــــــــــــــــــــــــــــــ

                                             
                                               نقطـة عَــرَقْ  !!

                                          *
يَادمُوعى ياالنَّـبْع الحَلال ..
بتفجَّـرى الأحـْلام سـُؤال مليان قلقْ ؛
وانا وانتِ ايـه ؟
         غير نقطة فى بحُور العرق وطريق نضال ؛
وبحُور من الشـِّعْر الزلال اللى اتخلقْ ؛ 
وفوق كتافـُه قضيٍّـته ؛     
وشطوطه حاضنة سكِّتـُه رغم الخطر !! ؛     
 وبرغم أشباه الرجال ؛
         والمأجـورين والحاقدين ؛
                 وديـول كلاب فى كل قـَصْـر؛
                        والمحسوبين على كل عصر وفيه ضلال !! 


بس الأكيـد : إنـُّه ( حَ ) يفضل مننا ..
                              نـــور شِعـرنا ..
                                يعنى احنا مش( حَ ) نمُوت .. مُحـال !!
و ( حَ ) يفضل النيل والقصايد والسُّؤال اللى انطلق ؛
                                  و ( حَ ) تبقى حبـَّات العرق ..
                                             مخلـُوطة بالدَّم اللى سال  !!
تكتب على الأسفلت .. وبنور دمَّنا  :
                             يحْيـَـا الوطــن ؛
                                       والحَــــــقْ ؛
                                              والخيــــــر ؛
                                                     والجَمَـــــال  !!

                                                    ***
ـــــــــــــــــــــــــــــــــ
محاولة شعر/حسنين
ـــــــــــــــــــــــــــــــــ

                                         الوتــــــــــر !!
                                                    *


أجْمَلْ ( وَتـَـرْ )  مَشـْدُود فى ( عـُود )  حَـوَارينـَا .. 
بيهـزْ فينا اللحن نتسابق ونهتف ( بُو ) ..
                 حتـَّى الأجـِنـَّة ( حَ ) تيجى ويخرجوا ( يحبو )!!
يبدُرْنـَا جـوَّة الحَوَارى ..  زىْ سـُنـْبُلْ ضـَـىْ
                                    يطلع رغيف شمسنا ..
                                                     مستوى .. مُشْ ( نَـىْ ) !!
ويقول لعين الشمس : ياشمُّوسَة ..
                          إحمى كمان وكمان ..
                                        وافرشى المحروسة !!
يُخرجْ جميع الولاد ويقـُولوا : الله حىْ ؛
ويقولوا : شعبكْ يامصر ..
                     ــ إنت اللى بعْد الله ــ
                                      إنت اللى باقى وحـىْ !! 


                                                 ***


                                              الحــــزن
                                                   *

ومين يقدَرْ يقول للحُـزْن ماينبتْـشى جـُوَّانا  ؛
ولا يلفلف بأغصانـُه جدَار الـروح ؟ ؛
ومين ( عَ ) البـُوح ( حَ ) يتجَــرَّأ .. فى بَحْـر الصَّــمت  ؛
ويعشق سكِّة الرايحين ..  بلا عـُودة ؛
                                     ويعشـقْ مـُوته برصاصة ..
                                                            على الأسْـفلت  !!

                                               ***


                             مصلحة التوابيت الثورية !!
                                                 *

ياصباح الخير ..
على قلب المحروسة حبيبتى ؛
                وبرغم إنَّـها مش حَاسَّـة بطيبتى ..
                                               أو .. جايـز خيبتى !!

لكـنِّى ( حَ ) افضل ادَافع عنها لحدْ المـوت !!
علشان يمكن ــ على قبرى ــ  تحـُطْ الخُـوص والوَرْد ؛
وتفوت  ــ وبجـدْ ــ  ترش شوية مَـيَّة ..
                             فـوق صبـّارة سِتـِّى .. ؛
                                        واللى زارعاها بْحِـنـِّـيَّة ..
                                                        وقبـل ٍمايخطفها المـوت !! 

أو يمكـنْ ..
تبعـتْ عمَّال مَصْلحة التوابيت الثوريـَّة ؛
وتشيل القبـر الشاغل ( حيِّزْ ) مالهوش لازمة ؛
ويقولوا دا عامل أزمة ف وسط المَوْتـَى ؛
                                          والسابقين على مُوتـُه ؛
ويمُوتوا ف نفس طريق أضغاث أحلامُه !! ؛
ويحـرّض كل النـَّاس قدَّامُه .. ( عَ ) الحُريـــة !! 
وبيجْمَـعْ ــ بعد الناس مايناموا ــ
           كُل الرَّاقدين ف شقـُوق التوابيت الثوريَّة ؛
                            ويقول الشِّـعْر ف قذف الذَّات الملكية ؛
                                                          ويقيموا عَلـىَّ الحَـدْ ..
                                                                     لحَــدْ (  مَ  ) امُــوت !!

                                               ***              

                                        ميدان الكرامة
                                                *

ياأيُّها الأسفلت ف ميدان الكرامة :

إمتى العلامة والاشارة تبان ؟
وانا ماشى باهتف .. لمَّا ( صوتى ) راح !!
باهتف لوطن الجراح .. ولكافة الأوطان ،
                              والدم ناشع وصابغ كافة الألوان !!

لحظة ماكانت صدُورنا بيفتح شبابيكها الرصاص
تعلن سقوط الخيانة والوطن منداس ،
وبيجرى وسط الشوارع مش عارف له وصول ..
ياهلترى يقدر ف يوم ..
                 يروح المحكمة ويقول
                             واللا الشهادة - كما العادة -
                                                     على المقتــول ؟

***
                                       يهـــــــــــوذا !!
                                            *

مين ده اللى جسمُه ( عَ ) الصَّـليب .. مَصْلوبِ ؟
يَاخَضـْرَة قولى .. مَاتخـَافيش منْ ( حَـدْ )  ..
عُـمْر القلـُوب الطيِّـبة .. وبجَـدْ ..
                   تِـقْـدَرْ ترَجـَّعْ حَـقِنَا المَسْلـُوبِ ؛
                           وتجيب ( يهـُـوذا ) لِلقصَاص والحَـد !!    
                                              *** 



                                          

                      زَهْـــــرة الصَّبـَّــــار

              
المَسَافَة بين صَحَارَى الصَّـمْت .. وبْحُور الكَلام
نـَفْس المَسَافـَة ِبالتـَّمَام :
         ِبين العَطَشْ ِوالارتوَاء ؛
                       والكبرياء .. والإنحناء ؛
                                        والإنفلات .. والإحتواء !!

لكين بيفضل شىء فى منتصف الطريق ..
يقْدَرْ يبلْ الرِّيق من الجُوف الغَميق ؛
ويندِّى فى عرُوق الحَيَاة بالإخْضَرَار والانْتِشَاء !!

وانْـتِ الِّلى وَاقْفَة وصَابــِرَة فْ ( نُصْ ) الطَّريق ..
                                     بين الحَيَاه واللاحَيَاه .. فى الإنتظَار ..
يَازَهْرة الصبَّار يَاعَاشـِقَة نَبْـض الحَيَاه .. ويَّا الضيَاء !!
إنتِ المُعَادْلَة المُعْجزَة بين المَرَار العَلْـقَمِى ..
                                         وبين حلاوة الاخضرار ؛
وانتِ الِّلى بتـْـشِاهْدى القَرَار المَلْحَمِى سَاعْة الْفِطَام !! ،؛
                        وانتِ الِّلى واقفَة وشَامـِخَة .. لَحْظِةْ مُوَارَاة العِظَام !!


***

ياااااااازهرة الصبار .. أنَا العَاشِقْ لآَشْوَاك الحَرير ؛
وانتِ الِّلى قَادْرَة ( عَ )الرِّيَاح .. والزَّمْهَرير ،
وانتى اللى قَـدَركْ تغزلى بشمْس النــَّـهَار..
                                            تـُـوب لاحتضار !!  ؛
وتفتـّـحى زهرةْ جمالك فى الليالى ..
                                فى السكووون ؛
                                       وتْمُوتى لَحْظِةْ مَ الضـِّيَا (عَ ) الكُــون ..
                                                                               يكُـــــون !!

                                    المســــــــافة
                ( مقاطع منفصلة .. متصلة ؛ من صميم الروح !! )

                                       ( 11  )    

 َياحيرة الدَّمْ المسَافِـرْ .. فى تجَاويف العـرُوق !!           
                        لَوْ بوَّابَات القــلـْب ترفـُضْ تِمْــنحُه :
                                                   ختم تأشيرة مرُور !!

                                          *

                                      ( 12 )

الخُوف عَليك ياالقَلـْب مِنْ نـُوبةْ فَـَـرَحْ ؛
                     والخُـوف عليك .. لـَـوْ تُهْجُـرَكْ :
                                                مـُوجـة الَأَحْـــزَان ؛

وانـْـتَ الـِّلى مَعْـجُون بالشـَّجَنْ ؛
               وانـْتَ الـِّلى بتـْعَـدِّى المِحَنْ بثـَـبَات ؛
                         وانت الـِّلى فى قـَلْـبَكْ ( نَــايَات ) وبتعْـزفـَكْ ؛
                                                 وتغـنِّـى فيها .. أصدق الألحان !!

فاالخوف عليك ..
      تدخل فى جـُوف قـَلْب الفَـرَحْ أوْقـَات..
تِنـْـسَى المَسَافـَـة .. وتـْـنزلِقْ
                              فى هـــوِّة الأمْْــوَات !!

                                       *

                                  ( 13 )

وبَاحَــذرَكْ .. ياقلْـب واحِدْ وانشطَـرْ
                       بين الحَبيبـَة ( و ) الحَبيبَـة :
( النــُّصْ ) سَـافرْ فِى الخَطَــرْ ؛
و ( النــُّصْ ) تَــايهْ فِى المَسَافَـة الفـَـاصِلـَة :
                                       مَابين إرَادْتـَـكْ .. والقـَـدَرْ !!

                                     *

                                  ( 14 )

رَغـْم الحَوَاجـزْ والمَسَافـَة والـزَّمنْ ؛
وبْرَغـْم تـَضـَاريس المسَاحَة المُعـْـتِمَة وحْرُوف شـَجَنْ ؛
وبْرَغـْم رُوحى المُغـْرَمَة والمُرْغـَمَة ..
بَالْمِسْ إيديكِ فى الفـَضَا أوْ كُلـَّمَا .. شـُوقى انـْفَــجَْر :
بَااعْمِلْ عِـرُوٌق قـَـلْبى وَتـَرْ .. فـَـْيشِـدِّنى :
أعـْزفْ عَليه .. فـَيْـرُدِّنِى رَجْع الصـَّدَى فـُوق السَّحَاب ؛
                               وتـْرُدِّنِى لـَمْسِةْ إيديـكِ فِى الفـَضَا
                                      والقانى باحضن كف ايدى .. والسَّرَاب !!

                                    *

                              

                              المَسَــــــــــافـَة                     

                    ( مقاطع منفصلة .. متصلة ؛ من صميم الروح !! )
                    ـــــــــــــــــــــــــــــــــــــــــــــــــــــــــــــــــــــــــــــ


                                                ( 1 )


تِفْصِلِكْ عَنَّى مَسَافَة بحَجْم كَفْ اليَدْ ..
تِفْصِلنى عَنـِّـك مَسَافَة بْحَجْم المُسْتَحيل والشـُّـوق ؛
وتهِـِـزِّنى نَشْوتِى .. أََسْــكَـرْ ..
                        وأَرْجَعْ ( افـُـوق ) ..
                                  يمْلاَنى كَاس لَهْـِفـــتى ..
                                                   بالإشْـتِيَاق .. ِوالْوَجْـد !!
                                                 
                                                  *

                                               ( 2 )


لَـوْ ( حَــدْ ) قال : إنْ المَسَافَة ( حَــدْ ) ..
                         أوْ بَحْـر آخْـرُه : الْمَدْ والنِّسْيَان ..
أَكْسـَرْ قانون الطَّبيعَة .. وَاعْلِـنْ الطـَّاعَة ؛
                                         وطـَاعْـتِى هِـىَّ :
                                                      مُنـْتَهَى العِصْيَان  !!

                                                *
                                           
                                              ( 3 )

ولإنِّنَا رَغْم المَسَافَة .. تَنْهيدِة قـَـلـَـقْ  !!
كَان السُّـؤَال الِّلى اتـْخَلَقْ مِنْ ضِلْع أَشْـوَاق السِّنين :
مين اللى يقْـدَر ( عَ ) الحَنين ..
                            أَو انفِلاَت الإشْـتِيَاق ؛
 ويحـوِّل العشاق رَجَاهُمْ زَقـْزَقـَة ؛
                 ويْتـَرجمْ الأَحْلاَم حَقِيقـَة مُوَرَّقـة ِبالإخْضِرَار
                                                      ويدُوووبُوا حُبـاً فى أَتـُون ..
                                                                            حِلْــــم اللُّـــقَا  !!
                                               *

                                            ( 4 )

مَاانـْتَ الـِّلى عَايزْ يَاقـَلْبى .. تكُون عََلَى الْهَامِشْ
أو الْـمَسَافـَة الفَاضْـيَة كُلْ أوًّلْ سـَطْر !! ؛
وبْإيـه يفيد ( الصَّقْر ) حِـدِّة نظر ..
                               لَـوْ كَان جنَاحُه اتـْكَسَرْ ؛
                                                 وبَات عَديم الْأثـَـْر
                                                           وكَأَنـُّه مُشْ عَايشْ !!

                                               *

                                            ( 5 )

                                           
ادْخُـلْ مَدَارَكْ   ــ يَاقلْبى ــ  فِى المَجَرَّة   وْكَـــــون  ؛
                                 واحفظ مسافة تصون .. بين الاحتراق والبعد ؛
مَاانْـتَاش ( حَ ) تِقـْـدَرْ تكُـون فِى المَجَـرًّة : شَـمْـس !!
دَاانـْتَ ــ انْ قِـدِرْت  ــ يَادُوب ..
                           ( حَ ) تْـكُون فـُقَاعِـةْ هَـوَا ..
                                                   مِنْ صِريـخ الْـهَمْس !!

                                              *

                                            ( 6 )

إفتَحْ لى شبَّاك غـُربتك ؛ رغم المسافة والوجع ؛
واوصل لى شريان انقطع جـوَّة الصدور ؛
                   واطـْـلِقْ أَنَا عَصْفـُور حـَنينى نَاحْيتـَـكْ ؛
                                                وَابْعـَتْ مَعَاه كُلْ السُّطـُور..
                                                             تِـشْهَدْ بصدْق محَبـِّـتى ..
يرْجَعْ لِى شـَايلْ فَرْحِتى .. رَغـْم الألَـمْ ؛
                                   وَاوْهِبْ حَيَاتى كُلَّهَا ؛
                                                وادِّيـك وجُـــــــــود
                                                               حَتـَّى العَــدَمْ  !!

                                               *

                                            ( 7 )


يَاغُرْبة القـَلْب المسَافِرْ فى الخـَريطـَة المُوحِشـَة ..
كُرْبَاج حَنينـُه فى الحِشـَا ــ فـُوق كُلْ نَبـْضـَة  ــ  ؛
                                                   وَلاَ انْحَــنَى !! ؛
وَاهْرَِب بعشقـُـه وبْعَـذَابُه .. فى الغــُـنَا :
عِشـْقـُه العَليل ..
        عِـشـْقه الجَميل ؛
                     والمِسـْـتِحِى ؛
                            والمُسْـتَحِيل ..
                                   عِـشـْقـُه القـَوى ؛
والقلب يرْضَـعْ مِنْ جَفـَافـُه ويرْتـِـوى ؛
                                    وكَأَنـُّه نـَبْــع وسِلْسَبيل ؛
                                               وكَأنـُّه نِيــل مِنـُّـه انـْتـَشـَى !!

فـَاردْ ايديـه فـُوق المِسَافِـرْ .. 
                       فى المَسَـافـَة المُوحِشـَة !!

                                             *


                                           ( 8 )
                 
يَانَدْهِتـكْ ياالقَـلْب فى الكُــون والمَدَى ..
رَجْع الصَّـدَى مِنـَّـكْْ إليـك .. ؛
                 وَانـَا بين إيديك فِى المُبْتـَدَا .. والمُنْتـَهَى ..
رقـَّصْ ضلـُوعِى كلَّهَا وبنََـبْض إيقـَـاع النـَّـغَمْ ؛
ِواجُعَـلْ مَسَافـْتِى فْ دُنـْيتـِى :
                  رحْلِةْ فـَـرَحْ .. منْ غَـير أَلـَـمْ !! ؛
ِواوْهِـبْنِى يَاقـَلْبى الدِّمَـا ؛
                 أوْهِـبْهَا وَطـَـنِى .. كُلـَّمَا
                            جَـارتْ عَليه الْأنـْظِمَـة ؛
                                      وَارْجَـعْ ألَـبِّى نـَدْهِـتـَكْ ..
                                                  حينٍ ٍ تقـُولْهَا فِى المَـدَى !!

يَانـَدْهِـتـَكْ يَاالْـقـَلْب فِى الكُــون .. ِوالمَـدَى !!

                                           *

                                           ( 9 )


يَاشَمْسِنَا المَدْفـُونـَة فِى تـَلْج المَنـَافِى ..
بَانْـدَهْ عَـليكِ ــ بقـَلْب صَافِى ــ والمِسَِافـَة بْحُـور ..
مَاقـْدرْشِى بَحُر القـَوِافِى ــ عَلَى ِوسْـعُه ــ يمْنَعْ الْمَقـُـدُور ؛
أوْ صُوتى يوصَلْ ويـِوْصِلْ ( عِـرْقـِنـَا )  الدَّافِى  ؛
                         وازَّاى أَوَاصِـلْ ؛ وفيه فـَاصِلْ ِوسـُور أشـْوَاك ..
لكين حتى وانا ( حافى ) .. بَاحَاولْ ينـْفِتِـحْ شبـَّـاك ؛
واشـوف شمـسى اللى مدفونـة ( ورا ) العتبات ؛
ومعجـونة فى تلج المنفى والتــوهة ؛
                                     واكـون أوْفـَـى  ؛
                                              وَارَاهـِنْ ـ حَتـَّى ـ عَـَلى المَسَافـَات !!

                                              *

                                           (  10 )    


بين المَسَـافـَة والمَسَـافـَة ..
                         مَسَـافـَةْ صَـمْت ؛
والصَّـمْت سَـمْت القـلـُوب المُرْهَفـَة الشـَّفـَّافـَة ؛
                  وسَاعَات تكُون خَـوَّافـَة مِنْ لـَحْظِةْْ جنـُـون ..
                                                      أو مِنْ ظنـُـون مُرْعِبـَة ..
                                                                       بانْكِسَـار البَخـْت !!    

                                               *