تخاطيف .. المُغَـنِّى العجُـوز
ــــــــــــــــــــــــــــــــــــــــــــــــــــــــ
رغم الإحبـاط الكَامن جُوَّة فى تلافيف النـَّفـس ؛
وبرغم الحـزن الناشـعْ ..
فى أركان جُـدْران العمر؛
فانتِ الأمل الباقى برغم القهر ..
لم يبخل يوم على قلبى بكل اليـأس !!
***
تخاطيف .. المُغَـنِّى العجُوز
ــــــــــــــــــــــــــــــــــــــــــــــــــ
يابسمتى المنحُوتة فى ( الوشْ ) الخشب :
إنتِ اللى باقية من أثر أزميل قديم ..
كان ( نصلـُه ) عـدَّى من هِنا ( ف ) لحظة صفا ..
يكشُـط تجاعيد التعب !!
***
تخاطيف .. المُغَـنِّى العَجُوز
ــــــــــــــــــــــــــــــــــــــــــــــ
يادمعتى الحيرانة وسط أوجَاع الطـريق :
إنتِ الـِّلى جايَّـة ؛
واللاَّ انا جاى لكْ ؟
نِفسى أقابلك لحظة الأشجان ..
يمكن يكون لى فى اللقــا ..
لحظة ( تِـبـلْ ) الرِّيــق !!
***
