مَـنـْــفـَــــــــــــى !!
ـــــــــــــــــــــــــــــــــــــــــــــــــــــــــــــ

مين اللى يقدر ياوطن ( يحتلِّنى ) إلا انت ؟
وانت اللى رقَّصتنى ـ مُرغم ـ ( على مدار الخوف ) ** ؛
وانتَ اللى على طول المـدى والشـُّـوف ..
شايف حيطانك ياااااااوطن منفـى ..
( سِكْرت تقاطيعُـه )** ف حانـات النيــل .. ولا استكْـفـَى !!
وازاى بقى جرح الوطن فى المنفى .. راح يشفى ؟ ؛
وازاى يطاطى النخيل أو ينحنى ؛
                      ويجف سعفه وينتنى .. فوق ترعتى الناشفة ؟ ؛
والنيل بيصرخ قهرتـُه من ميِّته الجافة ومن جفاف روحنـا ..
  شافنا حزانى .. قام بكى ( و ) ..خافنـا !!
مين اللى يقدر ياوطن .. يطلع وينصفنا ؟ ؛
والنخل طالع للسما .. ممدود كما ( مـدْنة ) ..
تبعت ضراعة لوجه الله ولاولادنا وللانسان ..
يقوِى جناحنا الضعيف الحر ( ع ) الطيـران ..
وسط  العواصف  والمطر ..
                           يمحى الخطـرْ !!
ترجع سمانا بصَـفا .. من غير جفا ويطلع قمـرْ ؛
ونقول : يامصر يا ( لغة القدر ) ..
                   إمتى بقى ( نتهـجَّى ) فى حروف الكلام ..
                                                  وفى ( شعاع الصـور ) ** ؟
ـــــــــــــــــــــــــــــــــــــــــــــــ
**مهداة الى القيثارة العراقية الأديبة الشاعرة/وفـاء عبد الرزاق
صاحبة قصيدة( منفى ) بديوانها ( أمنحنى نفسى والخارطة )

لــــــــــــــــــــــ تخاريف ليلية ـــــــــــــــــــــــو !!

( لو ) بكَى الحَاضر علينا .. والتـاريخ والمَاضى هَان
( لو ) زهور الـــدَّم تطـرح .. جــوَّة أسفـــلت الميدان
( لو ) رضيتوا الذل يفـرض .. سطوتـه بْكرباج هوان

يبقـى ضاعــت مصـــر مـنَّا .. يبقـى تاه بينَّا الطـريق
ترجعُـوا تانى أذلـَّــة .. ترجعـوا لســـــوق ( الرقيـــق )
والأصــــالة والبسَــــالة .. تبقـــى ذكــــرى للصـديق
يبقى 100 مبرُوك عليكم .. دولة من صُنـْع الشيطان !!

الشرفاء يرحلون تباعاً :
  و .. د .. ا .. ع ؛  يا .. شـافيز !!
ـــــــــــــــــــــــــــــــــــــــــــــــــــــــــــــــــــــــــــــــــــ

وداع ياحبَّـة نوَّارة فى عنقـُـود الكريز .. ياشــافيز ؛
ومش ( ح ) تكون آخـر حبَّاية فى العنقود ؛
ولا آخر جنود الحق والثورة ؛
                   ولا آخر رغيـف للفقــرا فى البراويز !!

( ح ) تفضل ( ناصــــر ) الفكرة ؛
وعين ومسافرة على بكرة ؛
وعين باكيــة من الشُّـعرا و ( م ) الفُـقرا ..
                    على هذا اللى وصَّلنـا .. الى الدهاليز !!

ولا تنســى ..
تقول للغالى ( جيفـارا ) :
ضمير ( الحـارة ) مش نايم ؛
وليل القهـر مش دايم ؛
                 ولا ( ح ) ينام ولاد بُكـرة على الأفاريز !!

ولسَّة معانا فى قلوبنا ضمير ( ناصـر ) ؛
وغيــره مافيــش ؛
وبنحاصر ..
جيوش الضلمة والخفافيش دعاة الـزيف ..
دُعـاة الأسلمـة بالسيـف ..
دعـاة الجهل والغفلة ..
        على غفلة من التـاريخ .. بلا حكمة .. ولا تمـييز !!

وللحرية شجرتها اللى ترويها ( دمَـا )الثــوَّار ؛
وثمرتها أكيد راجعة على الخونة بكل دمار ؛
وحَـطَــبْ الثــــورة : ثـــــوَّارها؛
تقيد نارهــا على الكهنــوت ؛
                    ولا يُـمكن لشعب يمـــوت ..
                                  لأنــُّه .. بالكرامـــة عزيــز !!

وداع ياحبَّة نـوَّارة ..
                   فى عنقــود الكريز .. ياشافيز !!
ــــــــــــــــــــــــــــــــــــــــــــــــــــــــــــــــــــــــــــــــــــ
محاولة شعر /حسنين السيد حسنين
6 مارس 2013
ــــــــــــــــــــــــــــــــــــــــــــــــــــــــــــــــــــــــــــــــــــ

وتــريَّـات .. المغنى العجوز
ــــــــــــــــــــــــــــــــــــــــــــــ

يادَمعتى الحَيـْـرانة وسط أوجَاع الطريق :
إنتِ اللى جايـَّة .. واللا انا جَاىْ لك ؟
نفسـى أقابلك لحظـة الأشجـان ..
يمكن يكون لى فى اللـقا ..
                       لحظـة ( تبـل ) الرِّيـق !!
                    ***


وتـريات .. المغنـى العجوز
ـــــــــــــــــــــــــــــــــــــــــــــ

مكتوب عليك ياالقلب فى التوهة والمنفى ..
إنَّـكْ تكون أ وفى ؛وتكـون خضوع وإيمان ؛
            وتكون دموع لشموع ..
                      محتاجها ليل عميـان ..                                      
                                  ماشى بيتكـفَّـى !!

                   ***
وتــريات .. المغنى العجوز
ــــــــــــــــــــــــــــــــــــــــ

بحر العطـش ( لْـوْ ) بطـش ..
 بيغـرَّق الدراويش ؛
وبيسـقى قلب القلوب ا لطيبة .. والهيش ؛
وانا قلـبى عاشق وراشـق ..
               فوق شطوطه ينـوح ..     
يرسم حبيبته بخطوطه فوق جــدار الروح ؛
ويكون قصيدة عتيدة ..  فوق سطوح البـوح ؛
ويعوم فى موج الأمل ..
                 واحد من الحرافيش !!

                   ***


وتــريات .. المغنى العجوز
ـــــــــــــــــــــــــــــــــــــــــ

ليله الليله دى ( الوتر ) مشدود على الآخر ؟ ؛
وانا كنت باتفاخر بالهدوء والصبر !!   ؛
وهل َدوىْ الســقوط للعنجهى الفاجــر ..
هوَّ اللى خللى الوتر ..          
         يخضع لهذا الأمـر ؟

سمع ( الوتر ) كلمتى ..
قام قال لى : ياشاعر ..
                مالكشى .. لا فى الغنا ..
                               أو فى البكا ( ع ) الورد !!
حتَـى ان رقصت بفرح .. او حتى تلطم خـد ..
إنت بترصد حياه ؛
           وبصدق فى مشاعر !!

                     ***
                    
       
  

وتريـَّـات .. المغنى العجـوز :

(  اللعْبـَــــة )

كًسَرت الطـِّـفل جُـوَّايا ..
عَشــان لعبة ماهيـش ( ليَّـة ) ؛
                                  ولا بتاعـْـتى !! ؛
وَلا أمْـلـُكْ سوَى حِلمى العَبيــط بيها !! ؛
وفـُوق الحـيط ..
فى آخر ( حـتَّــة ) مَنـْسـيَّة ؛
ومطويَّة ف جـدَار قلبى ..
أخططها وأرسمْهَا بطباشـيرى ؛
وأرسمْ فـُـوقها مباسمْهَا ؛
والوِّنها .. بتأثـيرى .. وتفسيرى ؛
وأرجـعْ خطــوتين قـدَّام .. أبـُصْ لها ؛
و ( ابــلْ ) الريشة من قلبى ؛
                              واحـُط رتـُـوش ؛
                                            واحـُط رمُـوش ..

برغم انِّـى .. ماشـُـفـتش يـُوم مَلامِحْهَا ؛
ولا شفـتش ؛
ولا حسِّـيت .. سوى بروحهَـا ؛
ولااقدرشى ..أكسَّــْرها بخيـَالاتى ؛
ولا أملك سوَى صَمْتى ؛
وأكسَـرْ ( طفلى ) جـُـوَّايا ..
        عشان اللعبة مش ( ليَّـة ) ؛
                               ولا بتاعْــتى ؛
                                    ولا املــكْ .. سوى حلمى العَبيط بيهَا !!

                           ***