رحـــــــل الفاجومـى .. عم احمد فؤاد نجم
وفى يده منجــل حصاد مكتسبات الثورة!!
ــــــــــــــــــــــــــــــــــــــــــــــــــــــــــــــــــ
ياعم احمــد ..
وشايفك وانت بتقول لى : 
ياواد إنت .. إحنا مش ( ح ) نمُــوت ؛
وطول م ( عبد الله النديم ) ويَّاك ..
وطول مابشِـعْرك شايل النبُّوت ..
( ح ) يفضل شعرنا ثورة ..
على الخونـة .. و(ع ) الكَـذَبة .. و(ع ) الكهـنـُـوت !!

أقول لك : طالت المحنـة ..
ترد تقول لى : طـُول مااحنا شـداد وعفَاى ..
وشعــبك صاحى .. مش نسّــاى ..
مافيش قـوَّة ( ح ) تهزمنا ؛
                        و ( لو ) نمنا فى قلب تابــوت !!
ــــــــــــــــــــــــــــــــــــــ
مع السلامة ياعم احمد
ــــــــــــــــــــــــــــــــــــــ

وتريات .. المغنى العجوز : لحــن !!

يارقصِتـِكْ يـَاالــرُّوح بيـن القـُوس والوتَـَرْ ..
رقصِةْ رفيف النحل فى جُوف الرَّحيق ؛
والخُـوف ِ تسقطْ فى الغمييييق ؛
                  وتمُـوت على اللحن العتيق :
                              لحـْن : ضربَات القَــدَرْ !!
ــــــــــــــــــــــــــــــــــــ
محاولة شعر/حسنين
ــــــــــــــــــــــــــــــــــــ

نــــــزف منفـــــرد !! الى شهيدة كنيسة الورَّاق : مريــم

نزيف الحرف مايكفـِّـيش .. ولا دَمَّـى ؛
ونظرة عينك الحلـوة تزيد همِّـى وأحـزانى ؛
وأشعر .. إن انا الجانـى ؛
                 وانا المقتول بنظراتك فى دى الصورة ؛
وكل الذنب ياروحى ..
بأنـك وردة فوَّاحة ونـوَّاحة على جروحى !!

وانا وانتِ ..
برعم السِّن والفارق فى أعمارنا ..
قاتلنا رصاصهم المارق فى أفراحنا ؛
                           وتـوهة عقلنا وروحنا ؛
                                     وأمَّـة ضايعـة مقهــورة !!
ياريتنى كنت وياكِ  ؛
                 ونفس النظرة فى الصورة !!
ـــــــــــــــــــــــــــــــــــ
محاولة بُكا /حسنين
ـــــــــــــــــــــــــــــــــــ





            

وتريات .. المغنى العجوز : علبة سجايرى !!
ــــــــــــــــــــــــــــــــــــــــــــــــــــــــــــــــــــ

عِلـبة سَجَايْرى المِسْـتكنَّة فْ جيبـى ..
          إدِّتـْـنى دَرْس فْ يَعْــنِى إيه حُـرِّية ؛

  وقـدرْت أعْرَفْ إنْ ( فِيَّه ) إرَادَة ؛        

                      وانْ السَّعَادة بين إيدينـَا أمَانـَة ؛
                                              أو .. أ ُمْـنِـيَّـــة  !!

                                     *
أوِّلْ ( مَ ) بَافْتَـحْ علـْبتى وَانـْزَعْ السٌّـلُوفـَانـَة  ..
ألقى السَّجَايرْ فى الطـَّابُور فـَرْحَانـَة ..
عَايْزَة الخرُوج للهَـوَا .. ؛
         ولنسمة بَارْدَة نَـدِيَّــة ..
              تطلبْ ــ بشـُوقهَا ــ الهَرَبْ مِنْ حَبْسِة العبُوديَّة !!

وأمِدْ ايدى ــ بشـُوق وَريدى يتــْحِقِنْ دُخـَّانِى ــ ؛
                             وَاسْحَبْ سيجَارة ــ بْكِـيانى ــ
                                                   أحِسْ بيهَا سَعِـيدَة :
خـَارجَة لدُنْيَا جديدَة تفـْرَحْ بيهًا ..
لكِنْ عـُود كَبْريتى .. مَايْكَمِّلـْشى فـَرْحتـْهَا ؛
              وتـْرُوح ( ضـَحِيَّة )  فْ عِزْ بَهْجِتْهَا ..
                                           فى أحْلـَى لحْـظة :
                                                      لحْظـِةْ الحُـرِّيـَّـة !!

                                                  ***
ــــــــــــــــــــــــــــــــــ
محاولة شعر/حسنين
ــــــــــــــــــــــــــــــــــ

وتريَّات .. المغنى العجُوز : نزيــــف  !!
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مين يفكَّر فى حرُوف كلمة : ن  ز يــ  ف ؟
كلمة بتهـز الكيان ؛
وارتعاشة لأى قلب يكون رهيف !!
كل حرف من حرُوفها .. يشرح المَعنى المُخيف :

ن     بنقطـة
ز     بنقطـة
يـ    وتُملك نقطتين
ف   بنقطة

يعنى زى الدّم تنزف بالنـُّـقَـط ْ .. ويَّا الأنين !!
زى حرُوف كلمة :
                         و
                              د
                                   ا
                                      ع
والأكيـــــد إنـه لحكمََة ..
               جَمَّـعِـتـْـهُـمْ فى ( اللغـة ) متفـرّقين !!

ـــــــــــــــــــــــــــــــــــــ
محاولة شعر /حسنين
ـــــــــــــــــــــــــــــــــــــ

هـَــــــــــــــــــزَّة !!
ـــــــــــــــــــــــــــــــ
لحظة مابيعلن مستر ( ريخــتر ) عن هزِّة زلــزال ..
فى الحال فى الشارع .. تلقى جميع القـُوم:
السُّـكان فى البرج ( العالى ) وسكان ( البدرُوم ) !!

و ( ف ) لحظة مابتتهز ــ بقوَّة ــ
            (  فازات المورانو ) .. و ( لمبات الجَاز )..
بيكون إعجاز الهزَّة ( ف ) لحظة لذة بكل الصدق :
يتبدرْ الشارع ( خلـْـق ) ويمكن أول مرَّة بيشوفوا بعض ..
لكن بعض الخوف بيوحَّد كل قلوب الناس !!
ويدُوب إحساس اللحظة على الأسفلت ؛
أول ( قرن التـُّــور ) مايعدِّلْ فى موازين الوقت ؛
و تعود ( لمبات الجاز ) .. وتعود ( الفـازات المورانو ) ؛
والكل يعُود فى مكانه بنفس الحال ..
زىْ قبل مايعلن مستر ( ريختر ) .. عن هزِّة زلزال !!
ـــــــــــــــــــــــــــــــــــــــــــــــ
محاولة رصد تخاريف /حسنين
ـــــــــــــــــــــــــــــــــــــــــــــــ

البــواكـــــى!!
ـــــــــــــــــــ

إحنـا عشَّـاق الشوارع والحوارى والأزقَّة والعطوف ؛
واحنا عشَّاق السهر تحت ( البواكى ) ؛
و البواكى فوق جراحنا ..
               لو جَـرَحْـنـَا أى خُـوف ؛
                        حتى ( لـوْ ) نامت عيونـَّنا ..
                                              قلبنـا : يُخـرج يطُـوف !!
ـــــــــــــــــــــــــــــــــــــــــــــــــ
محاولة رصد /حسنين السيد
ــــــــــــــــــــــــــــــــــــــــــــــــــ

  وتريات .. المُغَـنِّى العَجُوز : فراشة !!
ــــــــــــــــــــــــــــــــــــــــــــــــــــــــــــــــ
مَشـدُود انـَا .. وبكُل أوْتـَار النَّـغَـمْ ..
مابين ( نَعـــمْ ) أو ( رَفـْــض ) للحلــم العتيــق :
حلْـم الخـرُوج من ضيـق مسَاحة الشَّرْنـَقَـة ؛
واخـْرُجْ فراشة محلَّقة ..
                       متزوَّقـة ؛
                            ومصَـدَّقة ..
                                إنْ الزهُــور متْشَوَّقَـة ..
                                       تِمْنـحْ عُصَــارَات الرَّحيق !!
ــــــــــــــــــــــــــــــــــــــــــــــ
محاولة شعر/حسنين السيد حسنين
ــــــــــــــــــــــــــــــــــــــــــــــ


                                               

الطوفـان الثانى 30 يونيو 2013
ـــــــــــــــــــــــــــــــــــــــــــــــ
فى آخر ليلة من (يونيـه ) .. ؛
ونسمة ليل معدِّيـَّة على الميادين ؛
وليل القاهرة بيحضن ..
               ساعاته الأولى من (يوليه ) ؛
وما أدراك ما ( يوليه ) ؟
                      ولا سطُـوره اللى منحوتـة على الشرايين !!
*

فى آخر ليلة من ( يونيه ) ..
ونسمة ليل معدِّيــَّة تفرَّحنا ..
قابلت صحابى فى الندهة على روحنا  ؛
وبيغطى ـ بقطن وشاش ـ على جروحنا اللى مفتوحة :
هتاف رافض سحابةْ غدر مفضوحة ..
                                بتسحب من أمانينا ..
                                     بساط الحُبْ والخضرة بإسم الدين !!

*

فى آخر ليلة من ( يونيه ) .. ؛
وليل القاهرة بيحضن .. قصايد شـعر ..
قابلت صحابى فى الندهة .. ؛
                   وانا صحابى ماليهم حصر ..
                            كملح الأرض فى حب الجميلة : مصر ؛
وندهة ( بنتى ) ع الحُرية تسندنى وانا ماشى ..
وانا شايل على اكتافى ..
                  سنين عُمرى اللى مابقاشى !! ؛
وباهتف من صميم قلبى فى آخر ليلة من ( يونيه ) ؛
ونسمة ليل معدِّيـَّة وويَّاها أدان الفَجْـر ؛
و انا مستنـِّى ويَّاها أعيش فرحةْ حلاوة النصر ..
                       وأمُـوت باهتف مع ( بنتى ) : لتحيـا مصر !!
ــــــــــــــــــــــــــــــــــــــــــــــــــــ
محاولة رصد/حسنين السيد حسنين
30 يونيو 2013
ــــــــــــــــــــــــــــــــــــــــــــــــــــ

شجـرة الحنضـل !!
ـــــــــــــــــــــــــــ

يا (شجرة الحنضل ) .. أنا أكيد عارفك ؛
أصل اللى زارعك فى أرضى ونـام وارتـَــاح ..
كَارهْ صباح الفل والياسمين ..
(حالف) يمين التحالف مع الشياطين ؛
وبطبعُه عارف بأن زراعته بتتـروى بالدَّم ؛
ولا عُمْـرُه أبداً بالدّمـا يهتـمْ ..
أو حتى تطرح شجرتُـه ( ع ) المدى : تفـَّـاح !!
ــــــــــــــــــــــــــــــــــــ
محاولة رصد /حسنين
ــــــــــــــــــــــــــــــــــــ

البــواكـــــى!!
ـــــــــــــــــــ
إحنا عشَّاق الشوارع والحوارى والأزقَّة والعطـُوف ؛
واحنا عشَّاق السهر تحت ( البواكى ) ؛
و البواكى فوق جراحنا ..
                  لو جَـرَحْـنـَا أى خُـوف ؛
حتى ( لـوْ ) نامت عيونـَّنا ..
                          قلبنـا : يُخـرج يطـُوف !!
ــــــــــــــــــــــــــــــــــ
محاولة رصد /حسنين السيد
ــــــــــــــــــــــــــــــــــ

موكب الأكفــــان !!
ــــــــــــــــــــــــــــــــــ

جايبين ولاد الغلابة من رصيـف الفقر ..
متعشمين ــ بالقهر ــ باللقمة  ؛
                            و ( لِبْس) العيد !!
وبـإيه تفيد ( الهدْمــة ) والظــروف أحزان ؟
ونشوف براعم فى الصفوف ..
                             متلفعة الأكفـان ؟

وف شرع مين المتاجرة بالورد والرياحين ؛
( وقلوب ملايكة بتجهل حنكة الشياطين )
مستسلمين للمــوتِ .. ؛
              واحنا عشاق الحياه ..
نرفع جبـاه الحيارى المشتاقين للنور ؛
وتطُـل ( رابعـة ) عليهـم تكشف المستور ..
تكشف ( خوارج ) عصرنا الأغوات ..
تلعن ( منصَّات ) الديابـة والدُّقــون العُهـر ؛
وبرغم ( توب الكفن بتبلله الدمعات ) ..
بتجيب ولاد الغلابة من رصيف الفقر ..
متعشمين ــ بالقهر ــ باللقمة ولبس العيد !!
وان ( رابعـة تابت ) ..
      فى الزمان ده من جديد ؛
             أو لحظة ــ كالأنبيا ــ سكتتْ ..
                                      عن البوح بالحقايق ..
مش راح يتـوب الموتورين والأدعيا ..
                          إلا .. على ( عيدان ) المشانق !!
ــــــــــــــــــــــــــــــــــــــ
محاولة رصد/حسنين
ـــــــــــــــــــــــــــــــــــــــ
مهداه الى شاعر السويس/محمود جمعة
صاحب قصيدة : لبسوا الملايكة الكفـــن
                                     

.
        

هـــــــــروب !!
ـــــــــــــــــــــــ

أهرب ( م ) الخوف بالخوف ( م ) الخوف ؛
والخوف لا الخوف يسكننـِّى ف ننى الشوف !!
ـــــــــــــــــــــــــــــ
تخاطيف.. المغنى العجوز!!
ــــــــــــــــــــــــــــــ

وتريات .. المغنى العجوز : عكَّـاز
ـــــــــــــــــــــــــــــــــــــــــــــــــ
عكَّاز القلب الأعْــرَجْ ؛
والمنقٌـوش ( حِـنَّـة ) و ( حِـنِّيـَّـة ) ..
بيــدُق وشوش أسفلـت شوارع قلبـك ..
يمكن جنبك يلقى مكان ..
                  حـتَّى لــو كان ..
                        أسفل عمـدان النور المطفيـَّـة !!
ـــــــــــــــــــــــــــــ
محاولة شعر/حسنين
ـــــــــــــــــــــــــــــ

وتريات ..  المغنى العجوز : طـوق !!
ــــــــــــــــــــــــــــــــــــــــــــــــــــ
البُعد التالت فوق المسرح شكله عميق وغميق ؛
والقمـر الجاى حَـبْلان بالضىْ .. بطىء :
بخلان بظهُوره  ونوره ( ف ) كبد سمانا  ؛
والظاهر إن عَمَانا ــ ياخلق ــ رمانـا ؛
                  والطــُّوق قافل ( ع ) المخاليق !!
ــــــــــــــــــــــــــــــــ
محاولة رصد/حسنين
ــــــــــــــــــــــــــــــــ

كـــــــــــؤوس !!
ـــــــــــــــــــــــــ
( حانات ) الغدر .. ليه تسقى ( كاسات ) الدم ؟
وشلة خَـوَنَة سكرانه ..
           بسُـكْر الوهـم والحواديت ..
تموت بالحُـزن والحسـرة مع التـوابيت ؛
وفى المواقيت بيعرف شعبنا يضرب ..
         ولا مَهْـرَبْ .. ياصُنـَّاع الخـراب والهَـمْ !!
ــــــــــــــــــــــــــــــــــ
محاولة رصد/حسنين
ــــــــــــــــــــــــــــــــــ

ومين يقدرعلى الطوفـان .. و ( ع ) الثـورة ؛
ومين يقدرعلى رجوعى ؟
         و ( فرن الثورة ) ح يواصل ؛
                     ولـو يخبـز .. رغيف جوعى !!
ــــــــــــــــــــــــــــــــــ
محاولة رصد/حسنين
ــــــــــــــــــــــــــــــــــ

ــ صباح الخير .. على ( خَضْــرة ) ؛
ــ على آخـر قصيدة حـب لعينيـكِ .. من الشُّـعَـرَا ؛
ــ وللفـُـقــرا اللى قلبـوا ( السِّـحـر ) ع ( السَّحَــرَة ) .. ؛
   وقاموا يدبحُوا البقـرة اللى ( فاقـع لونها ) للكفـرة ؛
             ويخـرج ( ضلعـها ) يشهـد.. على الفَـجَــرَة !!
ــــــــــــــــــــــــــــــــــــــــــــــــــــــــــــــــــــــــــــــــ
هامـش :
 سـتـُـشــنـق كل رَاس خـاينـَـة .. على شجَرة !!
ـــــــــــــــــــــــــــــــــــــــــــــــــــــــــــــــــــــــــــــــــ

                نايـــــــــــات  !!

( تَـقَـَـبْ ) الرُّصــاص العَضْــم ..
               فى تجَـاويف الصُّـدُور OOOOO 
صَبَـحِتْ ( نَايَــات ) بلــُّلور .. مَصْــريَّـة عربيـَّـة
صَدَحـتْ بأحْـلَى ( الْـ غُنـَا ) :
                       للنـــُّور .. وللحُـرِّيـة !!
ــــــــــــــــــــــــــــــــــــــــــــــــــــــــــــــــــــــــــــــــــــــــــ
محاولة شعر/حسنين السيد حسنين 
ــــــــــــــــــــــــــــــــــــــــــــــــــــــــــــــــــــــــــــــــــــــــــ

       تخاطيف المغنى العجوز: بسمة !!
                          ***

يابسمتى المنحـُوتة فى ( الوشْ ) الخشـب :
إنتِ اللى باقيــة من أثر أزميـل قديم ..
كان ( نصلـُه ) عـدَّى من هِنـَا لحظة صفا ..
                                       يكشط تجاعيد التعَـبْ !!
ـــــــــــــــــــــــــــــــــــــــــــــــــــــــــــــــــــــــــــــــــــــــــ
محاولة شعر /حسنين السيد حسنين
ـــــــــــــــــــــــــــــــــــــــــــــــــــــــــــــــــــــــــــــــ

ـــــــــ

عصفــور !!
ـــــــــــــــــ
لـكْ حـــَــقْ تســـأل ياقلـــــبى أسْـــئِلـــة ْ مبهـُــــور :
عصفـورى ( جُـوَّة ) القفص .. واللا أنـا العصفـور ؟
تفــرق فـى إيــه غنـــوتك ( بــرَّة ) أو ( جُــوَّة ) ..
وانـت المغــــــنِّى ( صَبـَــا ) والجنـــــاح مكســــور !!

ــــــــــــــــــــــــــــــــــــــــــــــــــــــــــــــــــــــــــــــــــــــ
محاولة غنا / حسنين السيد حسنين
ــــــــــــــــــــــــــــــــــــــــــــــــــــــــــــــــــــــــــــــــــــــ

                  

مركب ورق  !!

ياالقلـــب قلبـــكْ مسافــــر .. بـسْ للمجْـهُــــول
وانتَ المعافـــر وراكـبْ وســـط بحــــر مهُـــول
مركب حنيـن من ورق مكتـُوب عليـه أشعــار..
يبقى انتحار لو يكـون ..عنـدك أمل فى وصـول !!

ـــــــــــــــــــــــــــــــــــــــــــــــــــــــــــــــــــــــــــــــــ
محاولة شعر/حسنين السيد حسنين
ــــــــــــــــــــــــــــــــــــــــــــــــــــــــــــــــــــــــــــــــ

                    

 سحـــــــــاب!!
ـــــــــــــــــــــــ

جبْـت الســلالم وفُـرشَــة ..وقـُــوس قَــزَحْ ألـوَان
وطلعـــت فـــوق فـى السَّــما أرســم بكـل حَنــان
( وش) لحبيبتى الجميلة فـوق (وش ) السحاب ؛
ونسيــت بأنــه مهاجـــــر.. ولا يحكُمُــــه عنـوان !!
ــــــــــــــــــــــــــــــــــــــــــــــــــــــــــــــــــــــــــ
محاولة رسم/حسنين السيد حسنين
ـــــــــــــــــــــــــــــــــــــــــــــــــــــــــــــــــــــــــــ

                  

هَـمْــس !!
ـــــــــــــــــ

قَــلبــى المعتَّــــقْ فـى حَانـات البـُــوح
بتـجى لـُه لحْظــة .. يشـتهى للهمْــس
و (ف) سكِّـتـُّة العتـمَـة تتُـــوه الــروح ..
رغــم انِّـى مَاشى فى اتجَـاه الشمْـس !!
ـــــــــــــــــــــــــــــــــــــــــــــــــــــــــــــــ
محاولة بوح /حسنين السيد حسنين
ـــــــــــــــــــــــــــــــــــــــــــــــــــــــــــــــ

الله الله .. يا ( مرسى ) جـاب الأسـرى !!

من حـقْ شعْـــب المحرُوســة ..
يخــرُج بقـى من دى الحُوسة
واللعبـــة جاهْـــزة ومدرُوسة
محتـاجَـة تمثيــل فى الأوبــرا !!

الله الله .. يا ( مرسى ) جـاب الأسـرى !!
                              ***

طبْ قـُول لنـا شهـدَاء رمَضان
ميـن اللـى صابهــم بالعــدْوان
وليــه بقـى اتخرسُوا الاخـوَان
وانـت البطــل صاحـب القـدرَة !!

الله الله .. يا ( مرسى ) جـاب الأسـرى !!
                             ***

والكدب عُمْـرُه مَالوش رجلين
والدنيـا دنيـا سلـف مـع ديــن
بكـرة الطوفــان يملا المَيادين
وتـكــون لكــل النــاس عـبْرة !!

الله الله .. يا ( مرسى ) جـاب الأسـرى !!
ـــــــــــــــــــــــــــــــــــــــــــــــــــــــــــــ
أدباتى  .. فى الزمن الردىء !!
ـــــــــــــــــــــــــــــــــــــــــــــــــــــــــــــ

لو مصـر تنطـَـقْ .. مين بقـى يسكِّـتْـهأ ؟
ـــــــــــــــــــــــــــــــــــــــــــــــــــــــــــــــــــ
طالعـَــة الحَــــوَارى تغنـِّـــى للحُــريـَّـة
والغنـْـــوة صابْحَـــة زَىْ نســمَة نديـَّـة
تغـْــزل خيـُـــوط الشمْــس فى الجـلابية
                  وتزيــح كابُــوس الغــدْر من سِكِّتـْهَا !!

***

طالعـَــة الحـَــوَارى شــلاَّلات من نـُــور
يكشـــفْ ديابـَـــة ويكْشـــفْ المَسْـــتُور
ولكُــل ( كَـاذبْ ) جَــىْ عَليـــه الـــــدُّور
                 لــو مصر تنطـقْ .. مين بقَى يسَكِّتْهَا ؟

***

طالعـَــة الحَــوَارى .. ترفـُـض الكهنُـوت
والشَّـــعْـوَذَة .. والغِـــــلْ .. والجَبـَــرُوت
والكــدَّابيـن الـِّلى اشــــترُوه بـ (زيُـــوت )
                 والمَهْـــر غَالــى والــدِّما .. شَبْكِـتْهَا !!

***

طالعـَــة الحَـــوَارى .. بالنِّــــدَا الرَّبـَّـانى
زلـْــــزلْ كَيـَــــان المُسْتَبـــــدْ الجـَــــانى
والشَّــعب قـــادر (يخلعــــه ) فـى ثوانى
                ولْفين يرُوح منْ مَصْـر.. منْ يكْبـتهَا ؟

***

طالعـَـة الحَـوَارى .. زى عيــدان الــزَّان
تهتـــفْ بأعلى الصُّــوت فى كُل ميــدَان
مَصْـــر اللى بَـاقْيـَـة ويسقُــط الإخــوان
               وبنـُور ( دمَانا ) نجيب لهَـا ضحْكِتْهَا !!

***

طالعـَــة الحَــوَارى .. مَسْجداً وكنيسَة
من قَلْب (سَانْت تريز) و (ستْ نَفيسَة )
تُطلـبْ عَدَالــة بـدُون عَـدَاوة خَسـيسة
               تدخُـلْ مابين ( البَصَـلة ) أو قِشْـرتْهَا !!

ـــــــــــــــــــــــــــــــــــــــــــــــــــــــــــــــــــــــــــ
محاولة رصـد /حسنين السيد حسنين
ـــــــــــــــــــــــــــــــــــــــــــــــــــــــــــــــــــــــــــ

 وتريات : شــــــرخ  !!
ـــــــــــــــــــــــــــــــــــــــــ

صُـبْــح الحَــزَانَـى ..  مُختـلِـفْ عَـــــنْ أى صُبــْــح
حتى ( المرَاية ) بأمانـة .. مُش راضية تعقد صُلْح
وتخـــبِّـى شــرْخ المَلامــــحْ فى جــــدار القَـلـْــب ..
مــع إنــُّه طيـِّـبْ مسَـامِـحْ .. مــشْ بهَـــــذا القـُبْــح !!
ــــــــــــــــــــــــــــــــــــــــــــــــــــــــــــــــــــــــــ
محاولة شعر/حسنين السيد حسنين
ــــــــــــــــــــــــــــــــــــــــــــــــــــــــــــــــــــــــــــــــــــــ

وتريات ..المغنى العجوز : سحابة !!
ــــــــــــــــــــــــــــــــــــــــــــــــــــ

جبْـت السـلالم وفُـرشَــة .. وقـُوس قَــزَحْ ألــوَان
وطلعـــت فــوق فى السَّــما أرســـم بكـل حَنــــان
( وش ) لحبيبتى الجميلة فـوق ( وش) السحاب ..
ونسيــت بأنــه مهاجــر.. ولا يحكُمُــــه عنـــوان !!

ـــــــــــــــــــــــــــــــــــــــــــــــــــــــــــــــــــــــــــــــــ
محاولة رسم/حسنين السيد حسنين
ــــــــــــــــــــــــــــــــــــــــــــــــــــــــــــــــــــــــــــــــــ

وتريات .. المغنى العجوز : همس !!

‎ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
قَــلبــى المعتَّــــقْ فـى حَانـات البـُــوح
بتـجـى لـُه لحْظــة .. يشـتهى للهمْــس
و (ف) سكِّـتـُّة العتـمَـة تتُـــوه الــروح ..
رغــم انِّـى مَاشــى فى اتجَـاه الشمْـس !!

ـــــــــــــــــــــــــــــــــــــــــــــــــــــــــــــــ
محاولة بوح /حسنين السيد حسنين
ــــــــــــــــــــــــــــــــــــــــــــــــــــــــــــــ

وتريات .. المغنى العجوز : شمعة !!
ــــــــــــــــــــــــــــــــــــــــــــــــــــ

‎

ياالقَلـب : قلْبـَـكْ بيعْشـــقْ .. قلـب مالهُــوش قلْـب
تمثال ( فينـُوس) من حَجَـرْ.. فوق قمة ( ألأوليمْب)
وانْـت اللـى ( ناحِــتْ ) حبيبك فــوق جـدَار قلبـك ..
هـل شمْعَــة وســط المَطــرْ .. تقـــدَر تنــوًّر ( دَرْب ) ؟
ـــــــــــــــــــــــــــــــــــــــــــــــــــــــــــــــــــــــــــــــــــ
محاولة سؤال /حسنين السيد حسنين
ـــــــــــــــــــــــــــــــــــــــــــــــــــــــــــــــــــــــــــــــــــ

أدباتى ..  فى الزمن الردىء !!
ـــــــــــــــــــــــــــــــــــــــــــ
الله الله .. يا ( مرسى ) جـاب الأسـرى !!
                             ***
من حـق شعـــب المحروســة ..
يخــرج بقـى من دى الحوسة
واللعبـــة جاهـــزة ومدروسة
محتـاجـة تمثيــل فى الأوبــرا !!

الله الله .. يا ( مرسى ) جـاب الأسـرى !!
                              ***
طب قـول لنـا شهـداء رمضان
ميـن اللـى صابهــم بالعــدوان
وليــه بقـى اتخرسوا الاخـوان
وانـت البطــل صاحـب القـدرة !!

الله الله .. يا ( مرسى ) جـاب الأسـرى !!

                             ***
لـوْ كان فى عِـرقكْ دم صحيح
والمسألـةمـش كـدب صريــح
إعــــدل شراعـكْ ويَّـا الريـــح
والشجــرة تطلــع مـن بـــذرة !!

الله الله .. يا ( مرسى ) جـاب الأسـرى !!

                             ***
والكدب عُمْـرُه مالوش رجلين
والدنيـا دنيــا سلــف مـع ديــن
بكـرة الطوفــان يمـلا الميادين
وتـكــون لكــل النــاس عــبرة !!

الله الله .. يا ( مرسى ) جـاب الأسـرى !!

ـــــــــــــــــــــــــــــــــــــــــــــــــــــــــــــ
أدباتى  .. فى الزمن الردىء !!
ـــــــــــــــــــــــــــــــــــــــــــــــــــــــــــــ

يـَاحيـرة الـدَّم المسَافِرْ فى تجَـاويف العـرُوق ..
 لَـوْ بـوَّابـات القلب ترفــُضْ تمنحُـه ..                                                                        ختْـم تأشــيرة مـرُور !!     
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
مقطع من قصيدة ( المسـافة ) ( 12 )
مقاطع منفصلة ..  متصلة ؛ من صميم الروح !!
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
         

                   

وتريات .. المغنى العجوز ( الحمامة )
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

آه ياقَـلبى ياالحمَــامة .. فـين تـرُوحى ؟
والغـُـرَاب ( النـُّوحى ) عشِّـشْ .. فـُوق سطـُـوحى !!

صباحيَّات .. المُغَــنِّى العَجُوز  ( صباح الخوف !! )
ـــــــــــــــــــــــــــــــــــــــــــــــــــــــــــــــــــــــــــ

صبـَـــاح الخُـــوف ..
صبـَـاح الخـُــوف على ( بُكْــرَة ) ومن ( بُكْــرَة ) ؛
و ( بُكْـرَة ) خُوفـُه من خـُوفنـَا .. إذا خُفنـَا !!
( حَ ) تطلــعْ شمْسُـه وتشُـوفنَـا ( ورا ) القـُضْبـَـان ؛
وقِـفْـل السجْن مُـفْتـَاحُـه ..
                      فى إيـد (خَــوَّان ) ..
يبيــع الــدَّمْ والأوطــان .. عَـديـم الشُّــوف ؛
وأصْل ( البــذْرَة ) خـوَّانَـة .. ومزرُوعُـة فى قلْـب الجـُوف !!
ف لازمْ ينخلـعْ قـلبُـه ؛
             ويفـرَحْ بالوطَـنْ شعْـبـُه ؛
وتحبـَلْ شجَـرة الثورة ؛ وتطـرحْ ـ بالدِّمـا ـ ثمَـرَة ؛
وتكتب بالحقيقـة حــروف ؛
                       ولا نرجـعْ نقُـول تـَانى : صباح الخــُوف !!

وتريات .. المغنى العجوز  ( صورة الشهيد )
ــــــــــــــــــــــــــــــــــــــــــــــــــــــــــــــــــــ

أنـَا عِـشْـت لْحيـن مَاشُـفْت فى الطـَّـريق ؛
                         و شُـفْـت ( عَ ) البيــبان :
                                               الحَاكـمْ الجَبـان  :
المرْتعشْ من صُـورة الشـَّهيد ..
               مَرسُـومة ( عَ ) الحيطـَان ..
                          ( فَ ) عْرفت إنِّى فى الزَّمَنْ الرَّدىء !!
ـــــــــــــــــــــــــــــــــــــــــــــــــــــــــ
محاولة رصد/حسنين السيد حسنين
ـــــــــــــــــــــــــــــــــــــــــــــــــــــــــ

من رباعيــات الزمــن الــردىء  !! ( 2 )
ـــــــــــــــــــــــــــــــــــــــــــــــــــــــــــــــــــــ

هزِّيـت شغَـاف قلبـنـَا .. بالقََـتـْــل رَايــــحْ جَـاى
وبـدَم بـَـارد بتقتــلْ .. والشعْـــب مُــــشْ نَسَّــاى
والباقية مَصْـــر القويـَّـة .. دَايمَة وشبَابها عفَـاى
حَاضْنين هلالهُــم صَليبهُم كالأغنيـَة (ع ) النـَّاى !!
***
ماتكُـــونشى فاكــر بأنـَّــكْ .. حَاكـــمْ المَمـَــاليك
وبأن مَصـر التكيـَّـة .. من بَاقـى ( ورْث ) أبيـك
إسأل جَبـرتى العَرب (عَ ) اللى انتهُـــــوا قَبليـك
فُوق باب زويلة اتـشنَقْ مَملوكْها (طومَـــان بَاى) !!
***
أعمـَى بصيـرَة وبصَـرْ .. وخسرْت دُنيـَـا وديـن
والطـِّير يطـير فى السَّـمَا : بالعَــــزْم والجنَاحين
(عيسَى) و (مُحَمـَّـدْ) وأطهَـرْ ثـَوْرتين خَالـــدين *
و ( العَدْرَا) ربِّى اصْطفَاهَا .. نقْتِل ولادْهَا ازَّاى ؟!

***
عُـمْـر الجَمَاجـمْ مَاتسْـــندْ .. عَـرْش بالجَبــرُوت
واللى انكشَفْ عَـــوْرتُه .. مايفيدْش وَرق التـُّوت
والشعْـــب قـال كلمتـُـه : حُـرِّيـِّتـــى .. ياالمُــوت
( فانفـــدْ بجلـدَكْ وقَـلَّعْ ) .. والطوفَـان آهو جَـاى !!
ـــــــــــــــــــــــــــــــــــــــــــــــــــــــــــــــــــــــ
محاولـة بكـا /حسنين السيد حسنين
ـــــــــــــــــــــــــــــــــــــــــــــــــــــــــــــــــــــــ
* ثوارللشاعر/عبد الفتاح مصطفى
من ارضنا .. هل الهلال والدين

( عيسى ومحمد ثورتين خالدين )

شمُوس البَـدَنْ والــرُّوح ..
ـــــــــــــــــــــــــــــــــــــــــــــ

إنتِ الشمُوس ( الهَالَّـة ) عَ البــدَنْ والــرُّوح ..
لحْظــة ْ جمُــوح القلـب فى ( شــرُوق الغــــُروب ) ..
هَزيتِ جـذعـُه السَّـيْسَبـانى .. فامتثـَل مغلـُـوب عَـلى أمْـرُه :
اسَّـاقـط الرُّطـبْ المعتَّـق منْ قديــم خَمْـرُه :
                                    مَجْـنـُون أنـا بيكِ .. واللا حـَـلاوة البُـوح ؟
*

سدِّيت جـرُوح الأمْـس بهَمْـس أنْغامــكْ ..
يمْكن تــدَاوى الرُّوح من جَـرْح حرمَـانى .. وحرمَانـِك ..
                             فايضْ حنانـِكْ بالنـَّـدَى .. بسْ المَـدَى مدبـُوح !!

*

أنا وانتِ شمـْس وقَـمَــرْ ..
لا يجتمع شملهم ..
دايريــن فى هـذا الكُـون .. وَيـَّـا جَمال عشقـُـهُمْ ؛
و (فْ ) يُوم مايتجمَّعـوا حتى فى يوم معلـُـوم ..
لازماً .. قيامـة تقـُــوم !!
                  هلْ شمْسى ( سْر ) القـمَـرْ .. واللا القَـدَرْ ( حَ ) يبـُوح ؟

*

حَاوطينى بيكِ .. ويمْكنْ ـ بالدَّفـا ـ أرتاح ؛
مَكسـُور جناح طير الحَـنين من قبل مايْطير فى الصَّبَاح ؛
دَارت عَليه ريح الأنين على غُصْـنـُه ..
أوِّل مَاحَـــاول يشتهى حسْـنُه ؛ وينـُـول صَـفـَاه :
                            نادتْ عليه الرِّيـح : عِشْـقَـكْ دَه مشْ مسمُوح !!
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
محاولة بـــوح /حسنين السيد حسنين
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

مَـنـْــفـَــــــــــــى !!
ـــــــــــــــــــــــــــــــــــــــــــــــــــــــــــــ

مين اللى يقدر ياوطن ( يحتلِّنى ) إلا انت ؟
وانت اللى رقَّصتنى ـ مُرغم ـ ( على مدار الخوف ) ** ؛
وانتَ اللى على طول المـدى والشـُّـوف ..
شايف حيطانك ياااااااوطن منفـى ..
( سِكْرت تقاطيعُـه )** ف حانـات النيــل .. ولا استكْـفـَى !!
وازاى بقى جرح الوطن فى المنفى .. راح يشفى ؟ ؛
وازاى يطاطى النخيل أو ينحنى ؛
                      ويجف سعفه وينتنى .. فوق ترعتى الناشفة ؟ ؛
والنيل بيصرخ قهرتـُه من ميِّته الجافة ومن جفاف روحنـا ..
  شافنا حزانى .. قام بكى ( و ) ..خافنـا !!
مين اللى يقدر ياوطن .. يطلع وينصفنا ؟ ؛
والنخل طالع للسما .. ممدود كما ( مـدْنة ) ..
تبعت ضراعة لوجه الله ولاولادنا وللانسان ..
يقوِى جناحنا الضعيف الحر ( ع ) الطيـران ..
وسط  العواصف  والمطر ..
                           يمحى الخطـرْ !!
ترجع سمانا بصَـفا .. من غير جفا ويطلع قمـرْ ؛
ونقول : يامصر يا ( لغة القدر ) ..
                   إمتى بقى ( نتهـجَّى ) فى حروف الكلام ..
                                                  وفى ( شعاع الصـور ) ** ؟
ـــــــــــــــــــــــــــــــــــــــــــــــ
**مهداة الى القيثارة العراقية الأديبة الشاعرة/وفـاء عبد الرزاق
صاحبة قصيدة( منفى ) بديوانها ( أمنحنى نفسى والخارطة )

لــــــــــــــــــــــ تخاريف ليلية ـــــــــــــــــــــــو !!

( لو ) بكَى الحَاضر علينا .. والتـاريخ والمَاضى هَان
( لو ) زهور الـــدَّم تطـرح .. جــوَّة أسفـــلت الميدان
( لو ) رضيتوا الذل يفـرض .. سطوتـه بْكرباج هوان

يبقـى ضاعــت مصـــر مـنَّا .. يبقـى تاه بينَّا الطـريق
ترجعُـوا تانى أذلـَّــة .. ترجعـوا لســـــوق ( الرقيـــق )
والأصــــالة والبسَــــالة .. تبقـــى ذكــــرى للصـديق
يبقى 100 مبرُوك عليكم .. دولة من صُنـْع الشيطان !!

الشرفاء يرحلون تباعاً :
  و .. د .. ا .. ع ؛  يا .. شـافيز !!
ـــــــــــــــــــــــــــــــــــــــــــــــــــــــــــــــــــــــــــــــــــ

وداع ياحبَّـة نوَّارة فى عنقـُـود الكريز .. ياشــافيز ؛
ومش ( ح ) تكون آخـر حبَّاية فى العنقود ؛
ولا آخر جنود الحق والثورة ؛
                   ولا آخر رغيـف للفقــرا فى البراويز !!

( ح ) تفضل ( ناصــــر ) الفكرة ؛
وعين ومسافرة على بكرة ؛
وعين باكيــة من الشُّـعرا و ( م ) الفُـقرا ..
                    على هذا اللى وصَّلنـا .. الى الدهاليز !!

ولا تنســى ..
تقول للغالى ( جيفـارا ) :
ضمير ( الحـارة ) مش نايم ؛
وليل القهـر مش دايم ؛
                 ولا ( ح ) ينام ولاد بُكـرة على الأفاريز !!

ولسَّة معانا فى قلوبنا ضمير ( ناصـر ) ؛
وغيــره مافيــش ؛
وبنحاصر ..
جيوش الضلمة والخفافيش دعاة الـزيف ..
دُعـاة الأسلمـة بالسيـف ..
دعـاة الجهل والغفلة ..
        على غفلة من التـاريخ .. بلا حكمة .. ولا تمـييز !!

وللحرية شجرتها اللى ترويها ( دمَـا )الثــوَّار ؛
وثمرتها أكيد راجعة على الخونة بكل دمار ؛
وحَـطَــبْ الثــــورة : ثـــــوَّارها؛
تقيد نارهــا على الكهنــوت ؛
                    ولا يُـمكن لشعب يمـــوت ..
                                  لأنــُّه .. بالكرامـــة عزيــز !!

وداع ياحبَّة نـوَّارة ..
                   فى عنقــود الكريز .. ياشافيز !!
ــــــــــــــــــــــــــــــــــــــــــــــــــــــــــــــــــــــــــــــــــــ
محاولة شعر /حسنين السيد حسنين
6 مارس 2013
ــــــــــــــــــــــــــــــــــــــــــــــــــــــــــــــــــــــــــــــــــــ

وتــريَّـات .. المغنى العجوز
ــــــــــــــــــــــــــــــــــــــــــــــ

يادَمعتى الحَيـْـرانة وسط أوجَاع الطريق :
إنتِ اللى جايـَّة .. واللا انا جَاىْ لك ؟
نفسـى أقابلك لحظـة الأشجـان ..
يمكن يكون لى فى اللـقا ..
                       لحظـة ( تبـل ) الرِّيـق !!
                    ***


وتـريات .. المغنـى العجوز
ـــــــــــــــــــــــــــــــــــــــــــــ

مكتوب عليك ياالقلب فى التوهة والمنفى ..
إنَّـكْ تكون أ وفى ؛وتكـون خضوع وإيمان ؛
            وتكون دموع لشموع ..
                      محتاجها ليل عميـان ..                                      
                                  ماشى بيتكـفَّـى !!

                   ***
وتــريات .. المغنى العجوز
ــــــــــــــــــــــــــــــــــــــــ

بحر العطـش ( لْـوْ ) بطـش ..
 بيغـرَّق الدراويش ؛
وبيسـقى قلب القلوب ا لطيبة .. والهيش ؛
وانا قلـبى عاشق وراشـق ..
               فوق شطوطه ينـوح ..     
يرسم حبيبته بخطوطه فوق جــدار الروح ؛
ويكون قصيدة عتيدة ..  فوق سطوح البـوح ؛
ويعوم فى موج الأمل ..
                 واحد من الحرافيش !!

                   ***


وتــريات .. المغنى العجوز
ـــــــــــــــــــــــــــــــــــــــــ

ليله الليله دى ( الوتر ) مشدود على الآخر ؟ ؛
وانا كنت باتفاخر بالهدوء والصبر !!   ؛
وهل َدوىْ الســقوط للعنجهى الفاجــر ..
هوَّ اللى خللى الوتر ..          
         يخضع لهذا الأمـر ؟

سمع ( الوتر ) كلمتى ..
قام قال لى : ياشاعر ..
                مالكشى .. لا فى الغنا ..
                               أو فى البكا ( ع ) الورد !!
حتَـى ان رقصت بفرح .. او حتى تلطم خـد ..
إنت بترصد حياه ؛
           وبصدق فى مشاعر !!

                     ***