الليل سَتـَّـار
***
منْ قلْب الليل ..
وسوَاد الليل
منْ قلْب الضلْمَة وحَوَاليَّا ..
خَفَافيش الليل ،
وانَا مَاشى لوَحْدى فْ شَارعْ اسْودْ
اسمُه الويل ،
والليل سَتـَّار ..مَلْيَان أسْرَار
مَاتْـشُوفْهَا العين والدُّنْيَا نهَار ،
والكُلْ بيجْرى وَرَا اللقـْمَة الْمَغمُوسَة مَرَار ،
وانا ماشى ورَاكبْ ضَهْرى الهَمْ
كَأنى حمَار !!
ويَاريتنى حمَار !!
لكن مَعْلشْ..
طَبْ مَاانَا قـُلت : الليل سَتـَّـار
والليل ستـَّار !!
***
وانا مَاشى بَاصَفـَّرْ لَحْن حَزيـ ـ ـ ـ ــن
كَمَا الأيـَّام ،
والليل مَليَان :
حَوَاديت.. وكَلام ،
وفرَحْ .. وآلام ،
وولادَة .. ومًوت ،
وعيُون مَاتنام ،
وضَمير بينـَام !!
الليل خلانى أقـُول : يَاسَلاَم ،
والله ياريتنى أكُون رَسَّام
أرسم بالريشة وبالا حْسَاس
الليل والنـَّاس :
ـ الناس الهَايْصَة فْ كَاس خمْرَة ،
وليالى حَمْرة ،
وليالى حَمْرة ،
ـ والناس اللى دَايْبين ِم الشـُّووووق
تَحْت القمَرَة !!
ـ والناس النـَّايْمَة عَشَاهَا دمُوع
وبتشبَعْ جُوع !!
نايمين فى ضَلام ،
ولا حتَّى شمُوع :
راضيين بالصَّبر ،
ونار الصَّـــــــبْر ..
لحَدْ القبْر مَافيهـْش رجُوع !!
ـ والناس العَايشة ف وسْط الدُّنْيَا وزَىْ كلاب:
تستنَّى اللقمَة الفَايْضَة تجيلهَا
على الأبْوَاب !!
حتَّى فْ يُوم ان جَاتْ بالفرْض !
فتافيت ماياكُلها الدُّود فى الأرض
آه منك .. ياقوَانين الأرض :
اللقمة بتكْبَرْ للشبْعَان ،
والقرْش جَبَان ..
ماينامش لوَحْدُه فْ جيب خَوْيَان ..
القرش بيجْرى يرُوح عَ القصر !!
مايرُوحْش العشـَّة السَّاكن فيهاالخـُوف والقهْر ..
مَاينَامْش فْ أحْضَان الفََـقر !!
القرش جَبَان ..
ماينامش لوحدُه ف جيب خَوْيَان
ماينامش لوحْدُه فْ جيب مَوجُوع !!
وانْ جه ..
بيروح ع الدَّوَا والحُكَمَا وقتل الجُوع ،
والقتل ف حالة الجُوع ..
مشــرُوع !!
وَلا فيهش القاتل .. يبقى مُدَان ،
وَلا مَحْكَمة ،
وَلا مَحْكَمة ،
ولا قاضى وزنزانة وسَجَّان !!
لسَّة انا مَاشى لوَحْدى ف قلب الليل حَيْرَان
متشرد زى الكلب الأجرب
مااعرف ليَّا كيان .. ومكان ،
والفوانيس ف جناب الشارع ..
نـُورها بينعسْ ..عَ العمدَان !!
***
وف كبْد السَّمَا بيطـُلْ عَلَيَّا ..
قمر مخنـُوق
بحبال الضَّـىْ هنـااااااك مشنـُوق
بيلف بقى له سنين وسنين ..
بيْرُشْ وشاح الليل .. تفانين
واحنا ياشعرا
يافقــــرا
ياحُقـَــــــرَا
ندووووووب مَجَانين ،
ونقول فى هَوَاه : دَوَاوين أشعَار ‘
ونتوه فى الليل ..
والليــــل ستار !!
***
والرٍّيح ..جَايبَالى حُوَا ر اتنين
من وسْط الناس :*
- تعالى ياصاحبى نشرب كاس ،
( ونمـزْ ) انا وانت بسيرة الناس !
ماهو أصل الناس ..
بسيرتنا انا وانت ..
بُكْرَة ( تمـزْ ):
أما البنت ( فلانة ) عَليها ِحتــِّة ....... !!!
..................................................
..................................................
..................................................
..................................................
..................................................
..................................................
***
.. والصًّمْت يلفْ الشـَّارعْ تَانى ،
وامشى لوَحْدى مَعَ أحْزَانى ،
والمحْ طيف ملفوف القـَدْ كَأنـُّه غَزَال
أسحَبْ قَلَمى عَشَان اكتبْ لُه ميت مَوَّال
أكتب عَنْ جَرحى اللى كَوَانى
أرصْ قصيدة املا بْهَا ديوَانى
يمكن يُوم ..
يقرُوها الناس
وسط القعدة ويا الكاس ،
ويقولوا : الله يرحَمُه كَان شاعر ..
أو حَ يقولولوا عَليَّا حمَار !!
طب مايقولوا !!
حَدْ سَامعْهُمْ ؟
حَدْ سَامعْهُمْ ؟
طَبْ مَاانا قلت : الليل ستار
والليل ستار !!
***
***
محاولة رصد :
شعر/حسنين السيد حسنين
ـــــــــــــــــــــــــــــــــــــــــــــــــــــــــــــــــــــــــــــــــــــــ
* مقطع تصوير ( شريحة ) فى المجتمع ..لافكاك منها !!
* مقطع تصوير ( شريحة ) فى المجتمع ..لافكاك منها !!
ليست هناك تعليقات:
إرسال تعليق