رِسَالِةْ حُبْ

***

 (   عَارْفـَـة يَاحَبيبتى   )

شبَابيك القلب المَقــْفُولـَـة ؟

عَايز أفتحْهَا وَاشُوف الشـَّـمْس  ،

ِوالهَمْس اللى يدُور حَوَاليهَا ..

ِيتسجِّلْ جُوَّه كتاب العشـْـق وحَرْف بْحَرْف

أصْل انَا ِمنْ زَمَنْ التـِّجْوَال ِفى شوَاِرعْ حُبىِّ الضَّايع.ْ.

قفـِّـلت بيبَان القـَـلْب وقـُــلت :

                          لوْ ِينـْـدَهْ تانى عَليَّه الحُبْ ..

                                                  أنا مُشْ سَاِمع ْ   !!

ِتعـْـَرفى ليه ؟

عَلشَان انا ِعشـْـت زَمَان  ،

وَانا جُوَّه ضلُوعى حَاجَات ..

               مُشْ زَىْ بقيت البـَـنى آدْمين  :

قلبى ..  كَان الفـَـرَسْ الجَامحْ

           المَخلـُـوق علشان مَايكُون فى الحَلَبَة  :

                                       هُوَّ الفـَـرَس ْالرَّابحْ   !!

لكنْ ..

         فى الصَّخْر المَوْجُود عَلى أرْض الوَاقعْ  ؛

اتـَّـعْتَرْ فَرَسى قبـْـل مَايوْصَلْ  ،

ِواتسَرْبل بالدَّمْ الدَّافقْ ِمنْ شـُـرْيَانى ..

عَلشان كَان باَِصصْ للأفـُـقْ المُمْتَدْ بعيـ ـ ـ ـ ـ ـد

كان متهيأ له :

انْ الشـَّــفقْ الأحْمَرْ ِفى نهَايــْة الِمشــْوَار ..

رُوضة أزهَار ِمسْتَنيَّاه ..

                مشْ دَمْ الشمْس المَدْبُوحَة  !!

لكن دلوقت ..

وانا شايل أسألتى المطرُوحة وعايزة اجَابَة

مش قادر المـْـلِمْ لحْم لْسَانى ..

                            لاجْل أقـُـول  ،

وانا لحْم لسَانى ..

              ِمتـْـبَحْتَرْ – عَرْض وْطـُـول –

                                جُوَّه حَوَارى القـَـهْر  !!

ِوان كَان يتلمْ ..

بالقىَ حْرُوف الكلمَة تتووووووه ..

                  تتفرَّطْ بين ِسنـْـدَان الخـُوف ..  

                                                 والصََّمْت

  

عَارْفـَـة يَاحبيبتى ..

لوْ حَ نترجمْ حَتىَّ حرُوف ِكلِمة :  صَمْت

صَـاد

        ِميـم

              ِ تــهْ

رَاح نلقـَـى ترْكيبَة عَجيبَة  :

حَرْف الصَّاد :  صَبْر

حتىَّ الكلمة جَايـَّـة صريحَة من الصَّــبَّار   !!

المزرُوع فــُوق الشـَّـبَابيك

                       اوْ فى الحَــلـْـق

حتىَّ الخـَـلـْـق العَايـْـشة معَانا..

           دهنـُـوا بُه بـُـقْ الحَلَمَات فى الصَّدْر  !!

حَرْف : الميم

ِيبـْـَدأْ أوِّلْ كلِمة  :  مُوت  ،

والمُوت مُشْ لازم ْيبقـَـى بمَعـْــنَاه الحَرْفى

داالمعنى الحرفى لكلمة مُوت

                           أضـْـعَفْ أنـْـوَاع المُوت  !!

حتــَّى اللى بيمُوت بصَحيح ماهْوَاش مَسْئـُـول  !!

لِكن خـُـوفى عَليكى شديـ ـ ـ  ـد ..

           أصْل انتى بَرْضـُـه أوِّلْ حَرْف فْ اسِْمكْ ..  ِميم  !!

حَرْف التـِّــه ْ..

يَاولـــدَاه : تُوهَة ،

والتـُّـوهَة ف قلب الرَّمْل المُـتَحَرِّكْ

                         مش عَايـْـزَة قصَايدْ ..

                                         وَلا شعَـــرَاء  !!

لكن يَاحَبيبتى ..

أنا رَايح المْ لسَانى المتـْـبَحْتَرْ فى حَوَارى القـَـهْر ،

وألم حرُوف الِكلمَات التايهة ..

               يمكنْ .. أقدَرْ أنـْـطـَـقْ  ،

                         وََافتح شبَابيك القلب المَقفُولة  ،

                                             وأشـُـوف الشمْس  ‍‍‍‍‍‍‍‍‍‍‍ !!

*** 

محاولة شعر /  حسنين السيد حسنين