يوميات عامل فى بناء هرم خوفو
( هرم خوفه )
( أوراق قديمة من مخطوطات المتحف المصرى )
ترجمها عن الهيروغليفية الى العامية المصرية
عامل التراحيل /حسنين السيد حسنين
( حا - سا – نين - رع )
الثلاثاء
.. وسكنوا جنب شبَّاكى
على شجرة بلا أوراق
جوزين عُشّاق :
جوزين عُشّاق :
يمامة وصقر !!
الأربعاء
سألت زميلى – فى السخرة – وانا مطاطى على الأحْجَار :
- يمامة وصقر يتعاشقوا ؟ ،
وجانى الرد – متحشرج –
- ويتراشقوا بأحلى كلام ،
ويصبح صوتهم الدافى
نغم صافى .. ومانشيتات !!
ولمَّا حاولت أستفسر ،
وأستحضر معانى الحرف
نزل كرباج أفندينا
قطع سكِّة جواب صَاحْبى ،
وتاه فى الحفر !!
الخميس
عيون الفجر بصَّالى
وانا باصص من الشباك ،
وقلبى هنااااااك مابين الصخر والرملة ..
بيبحث عن جواب صاحبى اللى تاه فى الصخر !
الجمعة
كلام مكتوب على ورقة من البردى :
" خيال الضل راح يعرض – مع اللقمة –
فى ساعة الضهر
فى ساعة الضهر
حكاية عشق راح تبقى حديث الناس "
جمعت اللقمة والاحساس فى منديلى ،
وكان أزميلى - ف ادية - بصوت مبحوح
لست الحزن بيغنى
نشيد القهر !
.. وشمس الضهر كرباجها عمود ع الأرض
بدأنا العرض واللهفة تشد القلب :
مواكب زاحفة هتافة بكلام ممصوص
تحيى غراب قدر يخلق وفاق موقوت ..
مابين الصقر ويمامة بجناح مكسور
ايقاع خلفى
زمان السَّوْ لو مُوجة .. تطاطى له
وتطفى شمعة بكَّاية .. فى قنديله
ولو يحكم غراب البين علـــى غابــة
تخللى الطبل بالجُوقــة .. تغنِّـى له !!
وآه ياطيبة لو يصبح غناكى جُوع ،
وأه ياطيبة لو تدى يمامة لصقر ،
وترضى الفقر فى اللقمة وفى الهدْمَة ،
.. وترضى العيشة فى العتمة ..
عشان فرعُون !!
( ملحوظة ) :
.. مسحت بعينى – وانا باكى – ميدان العرض
لكين ..
مالقيتش شبَّاكى !!
السبت
هى كانت فين عينيكى .. يايمامة
لما دورتى بايديكى
ع الندامة !!
الأحــــد
بقى لنا زمان أنا وقلبى لابنغنى غنا فرحان ،
ولا أحلامنا بتخطى بيبان الحلم للواقع ،
ومين يفتح بيبان الحلم ويخطى ؟
وباب الحلم متجنزر وله حراس ..
يدينوا – حتى - بالأنفاس وبالنعمة
لمولانا الآله : آ – نـــــور !!
الاثنين
..وسكتت فيكى ياطيبة أغانى الحب !!
وسكتت فيكى ياطيبة أغانى الحب!!
26/3/1979
والتاريخ جزء لايتجزأ
يوميات عامل فى بناء هرم خوفو
( هرم خوفه )
( أوراق قديمة من مخطوطات المتحف المصرى )
ترجمها عن الهيروغليفية الى العامية المصرية
عامل التراحيل فى كل عصر وأوان :
حــــا - ســـــا - نــــى - يـــن رع
الشهير فى العصر الحديث :
بـ حسنين السيد حسنين
الشاعرة زهور العربي
ردحذفوآآه وجاااااااي على رأي الصعايدة
وتاه حرفي وأصبح ضئيييييل امام حرفك
يا هامة شامخة وحروفها قبس من نور
تكتب وتعرّي المستخبّي وتكشف المستور
ياااا ها القلم سيف مشهور في وجوههم
في لحظة يكون على رقابهم
يدغدغ وريد الرّوح لترقص من الفرحة ياااا ها الطّير المذبوح ويكاكي ويصحّي فينا الماضي والواقع ويبكينا على الآتي
يا عجووز وناسي ويغنّي بصوت صامد ولا هامّه يحلم ويفرح ويبكي ويا ريته يرسيله على راحة بال وياخذ من الكلمة راحته وينسى عناه
لكن هيهات يعملها لانّه ببساطة عجوز مفتون بالوجع وحبّ النّاس ومصر في دمّه ...
هذه القصيدة اذهلتني ولم اجد غير هذه الطّريقة اعبّر بها دمت بهذا الإبداع شاعري الرّائع الاستاذ حسنين
أزال المؤلف هذا التعليق.
ردحذفزهور : ياعاشقة للأوطان وللكلمة ،
ردحذفويا .. هايمة ف سما الأرواح
حروفك فى البراح .. نسمة
وندعة ( ضَىْ ) فى العتمة ،
وإيد حانية وبتطبطب على روحى ،
وتشفى جروحى بالأشعار وبالرحمة ،
ووسط الزحمة ألقاكى
نغم .. بيغنى للأوطان .. وللكلمة !!
***
عجوز قلبى .. لكنه عنيد ،
ودايماً سابق المواعيد .. وبيغنِّى ،
وأكتب فنِّى للشارع ،
........... وللحــــارة ،
.......وللشغيلة فى صحارى العطش والجوع ،
ويبقى ( العِنْد ) شىء مشروع !،
وتفضل كلمتى باقية وكلمة حق مش ممنوع ،
وقلبى الطيب الموجوع من الخونة وم الأندال ،
ح يفضل سيف على الظالم
............ولا يعرف للمهاودة خضوع ،
وح افضل اغنِّـى ( للحرية )
واشــد ( الضَّــى )بايديَّة من العتمة
ويبقى المجد للأوطان وللكلمة ،
................ويبقى المجد للكلمة !!