صرخة مصرى*

18/19 يناير 1977

(  1    )

          أنْهى درع .. وأنهـى سيف / يخرسُـوا الكلمَـة الشجَاعة
           أنهى باطل ..وانهــى زيف/ يقتلوا الجُـوع  .. والمَجَاعَة

                                   اقتلوا الجُـــوع ..بالرِّغيف / مش بغــــنوة .. فى الاذاعة

                                   ِحمْلى لَوْ شايلُه ( سيزيف )/كان حَ  يكْــفَرْ .. بالقناعَة !!                                  فانهـى درع .. وأنهـى سيف/يخرسوا الكلمة الشجاعة

***

(  2   )

                                 الرِّغيـف  لو كان قضـيَّة/ لازمــاً القاضـــى ..  يجُـــــوع                                  لاجْل يبـــــقى يحسْ بـــــيَّه / لمَّا اصْــرُخ     عَ الجُمُوع

           لمَّــا اجيلـُـــه وبيــن ايديـَّــه / صَحْن مَلْيَـان بالدمُــــوع

              مش يــرُدْ رصــاص عَليَّه/أو يدُوسْنى ..  بالبــــتاعَــة !!

            فانهى درع  وأنهى سيف/ يخرسُوا الكلمـة الشجاعة

 ***

(  3   )

            رَغْم عَطَشى .. ورغم جُوعى / قمت انادى فى الشوَارعْ

            شلت قلبى من ضلُـــوعى / قلت حَقِّى  ..ياللى ضَايــــــعْ

            ياااامحمـــد .. ياااااايسوعى  / إنقذونا  ..  من الفظايــعْ

                                   رغم عطشى .. ورغم جـوعى / صرخـتى ..كانت مشاعة !!                                                    فانهى درع .. وأنهى سيف/ يخرسوا الكلمة الشجاعـة

***

(  4   )

            علمُونى .. فى المـــدارسْ /  حَقى .. والخـــير والجَمَــــال
            علمُونى .. أبقـــــى فــــــارس / يــــدِّى رُوحـــه .. للنضَـال

             واعمل ايه و( الفقــر ) دايٍٍٍـس ْ / والأمل  ..  أصْبَــح خيَــال

                                  والفلُوس ..  من غيـر مَحَابسْ  / يصرفوها.. فى الــخلاعَـة !!

            فانهى درع .. وأنهى سيـف / يخرسوا االكلمةالشجاعـة

***

(   5   )

            وَضَّبُــوا لى .. فى الزَنَازنْ / بَسْ ( هَات ) النَّاس وحَـوِّلْ

                                 إبنوا شــادر .. للمَحَـازن/ افرضُـــوا ..  حَظْــر التجَــوُّل

                                 إعلنُوا فوق (  المَـآذن )  / إن ليلنــــا ..  راح يطـــوّلْ 

                                 اولعــُوا انتـُــو ( بجأز ٍ ) / إحنَا خَدْنَا خلاص .. مَـنَاعَـة

             فانهى درع .. وأنهى سيف / يخرسـوا الكلمة الشجاعـة

***

(  6   )

         إعلنـُـوهَا كلمــة وافيـــة  / مين بيُحْكُم فى البلَـــــــدْ دى
           ( مرعى ) واللا ( ابن وافيـة )*/ واللا ماشية  ( نقشبندى)

          أصلها ومُش عَاوزة قافيــة / أو فى حوجَـة لوصْفة (هندى )

          البلَدْ .. ِمن جُوعْــهَا : حَافْيَـة / واحْنا مُتـْـنا ف دى الشناعـَـة
           فانهى درع ..  وأنهى سيـف/ يخرسـوا الكلمـة الشجاعة

***

                                           تصوير شاهد عيان /                         
                              حسنين السيد حسنين                                 
                                       الاربعاء 19يناير1977
 كتبت هذا النص .. ردا على مقولة شائعة فى هذا الزمن الردىء على لسان الساداتى :
( على هذا البلد ان يأمن من خوف .. فلقد أصبح له : درع وسيف ) ..  وهو الجيش ، الذى أنزله الى الشوارع ليقتل متظاهرى ماأسمى ( بثورة الجياع !! ) وقال هو عنها انها ( ثورة حرامية !! )  .. وكتبت تلك المقاطع فى الشارع .. بل وكانت هتافاً على لسان الثوار !!  وكان يتولى نقلها مقطعاً بعد مقطع الى المتظاهرين : صديقى الشاعر الراحل/عرفة كيلانى .. رحمه الله .
  وكان حكم الشعب والتاريخ أقوى من كل الطغاة !!

ــــــــــــــــــــــــــــــــــــــــــــــــــــــــــــــــــــــــــــــــــــ
* رموز فساد فى تلك الحقبة من تاريخ مصر