مصلحة التوابيت الثورية !!
ـــــــــــــــــــــــــــــــــــــــــــــــ

يَاصَباح الخــير ..
على قـَلب المَحرُوسة حَبيبتى ؛
                   وبـرَغْم انـَّها مش ْحَاسَّة بطيبـْتى ..
                                                أو جَايـزْ خيبـْـتى !!
لكنِّى ( حَ ) افضَلْ ادَافع عَنهَـا لحَدْ المُـوت ..
يمكنْ  يُـوم على قـَبـْرى ..
                       تحُـطْ الخُـوص والـوَرد ؛
وتفـُوت ــ وبجَـدْ ــ تـُـرُشْ شويِّة ميـَّة ..
                                فـُوق صَبـَّارة سِـتِّى ؛
                                        واللى زارعَاهَـا بحنيـَّة ؛
                                                   وقبـْل ٍ مايخطفْـها المُــوت !!

أو يمكن ..
تبعَتْ عُمـَّال مصلحة التوابيت الثوريـَّة ؛
وتشيل القبر الشاغِلْ ( حيِّـزْ ) مالهُــوش لازمة ؛
ويقولوا : ده عامل أزمة ف وسط الموتى ؛
                                         والسَّابقين على موتـُه ؛
ويموتُوا ف نفس طريق أضْغَـاث أحلامُه ؛
ويحَــرَّض كل النَّاس قدَّامـُـه .. ( ع َ ) الحريـَّة !!
وبيجْـمَعْ بعْـد النـَّاس ماينامُـوا ..
                       كُل الراقدين ( ف ) شقوق التـَّوابيت الثوريـَّة ؛
ويقـُول الشِّعـر( ف ) قـذْف الذَّات المَلكيـَّة ..
                     ويقيموا علـىَّ الحَـدْ .. لحَـدْ ( مَ ) امـُوت !!
ـــــــــــــــــــــــــــــــــــــــــــــــــــــــــــــــــــــــــــــــــــــــــ
محاولة شعر /حسنين السيد حسنين
ـــــــــــــــــــــــــــــــــــــــــــــــــــــــــــــــــــــــــــــــــــــــــ