تخاطيف .. المغنى العجوز
ــــــــــــــــــــــــــــــــــــــــ
                              ( 1 )

البنت الـ ( كانت ) واقفة قصادى فى الأوتوبيس
شـدِّت بضوافر عينها طرف الخيـط
                                  من ( بَـكَـرة ) قلبى
                                       ..............
                                       ......................
                                              ( ف ) اتكَعْــبلت !!

**
                              ( 2 )

فى اللحظة الفاصلة ..
            مابين النَّـدْهَـة .. وبين اللفتـة
إستطعم قلبى طعـم الصـوت ..
                            ( ف ) سكِــرْت !!

                             ( 3 )

وساعات يبقى سمَـعى تقيل ..
              لكن باسمع عِـطْـركْ دايمًا :
                                        ينـدَهْ قلـبى  !!

                             ( 4 )


     معرفتش ارد ..
وسؤالها القاسى مفاجىء ليَّـة ــ بجـد ــ  :
ليه تمثال ( النهضة ) يابابا ..
                  محطوط بغرابة وهنا بالذات ..
                                   جنب جنينة الحيْـوانات !!     

                             ( 5 )

المنظر .. كان بالفعل عجيب :
شيخ الجامع فوق ( المَـدْنـة ) كان بيـأذ ِّن  ..
بس خيال الضِّـل ..صليب  !!

                            ( 6 )

لمَحتْ عينى الوش السمر بعيون خضرة
قفزتْ زى القمرة ( ف ) قلب سمَايا ..
                           كل قصايدى البـِكْـر الأولى !!

                           ( 7 )

( خنجر ) كلماتى .. رفعتُـه لفووووووق  ،
وغمسته ـ بقوَّة ـ ف ضوء القمرة ،
وغرزته ـ بكل جنون الشُّعرا ـ ( ف ) كل قصيدة بقلب خئون !!